സൗഹൃദത്തിന്‍റെ കണ്ണികള്‍
വീണ്ടും ഒന്നുചേര്‍ന്നപ്പോള്‍
കഴിഞ്ഞ വസന്തത്തെക്കുറിച്ചുള്ള
സ്മരണകള്‍ തിരയടിച്ചു.
കോരിച്ചൊരിഞ്ഞിരുന്ന പേമാരികള്‍
മനോമുകുരങ്ങളില്‍ വീണ്ടും
പെയ്തിറങ്ങി.
മഴത്തുള്ളികള്‍ തീര്‍ത്തിരുന്ന
മഴവില്ലുകള്‍ ചിന്താധാരയെ
നൊമ്പരപ്പെടുത്തി.
ഫുട്ബോള്‍ കളിക്കിടെ
വെള്ളം തെറിപ്പിച്ചതും,
തോട്ടിന്‍ കരയിലൂടെ
സ്കൂളിലേക്ക് നടന്നതും,
കുടകളുടെ ബ്രാന്‍ഡുകള്‍
മുന്‍നിര്‍ത്തി പൊങ്ങച്ചം പറഞ്ഞതും
ബ്ലാക്ക്‌ ആന്‍ഡ്‌ വൈറ്റ്
ഫ്രൈമുകളിലേക്ക് കുടിയേറിയത്
ഞങ്ങള്‍ അറിയാന്‍ മറന്നു.
എ.സി കാറുകളും
ഫ്രീ ഹോം ഡെലിവറിയും
നനുത്ത സഞ്ചാരങ്ങളെ
ഹൃദയ നെല്‍വരമ്പിലേക്ക്
പറിച്ചു നട്ടു.
സുഹൃത്തുക്കള്‍ പിരിയവേ
പൊഴിഞ്ഞു വീണ
നീര്‍ത്തുള്ളികള്‍ക്ക് പറയാന്‍
ആയിരം നാവുണ്ടായിരുന്നു.
No comments:
Post a Comment
ആക്ഷേപങ്ങളോ ഉപദേശങ്ങളോ തോന്നുന്നുവെങ്കില്‍ ഇവിടെ കുറിച്ചോളൂ..
പിഴവുകള്‍ തിരുത്തപ്പെടേണ്ടതല്ലേ?